Ni orain nola, noizbait ene Xamur

Aldiren zartak suntsi dezaneko;

orenek odol-husturik so-ximur

utz dezaneko; Goiz lirain deneko

adinaren gau erpintsura heldu;

orain jabe den eder-bitxi oro

galzori dueneko, edo galdu,

udaberri-lapur horren bezero;

Aldi hori datorreneko dut nik

geriza bilatzen, Adinen aizto

horrek ez dezan Maiteren ederrik

oroimenetik ken, hil arren gaizto.

Haren ederra lerro beltzotan biz,

hemen dirauen berde beti biziz.