Al
Jazeera, gatazkaren ikuspuntu berria
EEBBetan
gertatutako atentatu eta Afganistanen aurkako erasoen
ondoren, Al Jazeera arabiar telebista
mundu zabalean ezaguna egin da, amerikar hedabideek orain arte zuten
monopolioa hausteko gai izan den bakarra delako.
Al
Jazeera telebista izugarri ezaguna egin da europar eta EEBBetako mass-media
kate erraldoiek igorritako albisteak beste ikuspuntu batetik jorratzearren,
atentatu eta Afganistanen kontrako ekintza militarren ostean.
Kate
honen egoitza Duhan aurkitzen da, Qatarreko hiriburuan, hain zuzen. Hiri
aspergarri hau arabiar munduaren gune mediatiko garrantzitsuena bihurtu da;
hau bai kontraesan handia: Qatar herrialde arabiarren artean txikiena dugu.
Modernotasuna
eta tradizioa elkar loturik dabiltza Al Jazeeran. Arabiar CNNak, gehienek
izendatzen duten bezala, askatasun osoa dauka bere programazioa
aukeratzerakoan, gainontzeko hedabide arabiarrak ez bezala. Hasteko,
Qatarren ez dago inolako informazio ministeriorik, hau indargabetua izan
baitzen, eta egoera hau nahitaez lagungarria da.
CNNk menperatzen zuen nazioarteko albisteen monopolioa
hautsi egin du ekialde hurbileko kate libre honek. Satelitez emititzen du
eta arabieraz izaten da programazio osoa. Kate honek gatazka hasi zenetik
emandako esklusibengatik itzelezko ezinegona sortu du, bai herrialde
arabiarren artean, bai Europa, EEBBak, eta oro har mundu osoko herrialdeetan
ere bai.
Orain dela bost urte sortu zen eta 300 langile ditu bere
kontu. Harrigarria da emakumezkoen presentzia, lantaldearen ia erdia osatzen
baitute. Katearen programa nagusian, hau da, “La dirección opuesta”
deritzon eztabaida programan makina bat emakumek dihardu, bai erredaktore
gisa edota solaskide bezala.
Bestalde, albiste zerbitzuen emisioak bikoiztu
egin dira atentatuen ostean. Hala ere, arestian esan bezala, programa
nagusiak eta ikusle gehien bereganatzen dituztenak eztabaidazkoak dira, beti
zuzenean eta polemikaz gainezka.
Bere independentzia eta batez ere mundu islamiarrarekiko
duen loturagatik, kate honek emandako berriek mundu arabiarraren mugak
gainditu dituzte, bereziki, atentatuen ondoren eurak izan zirelako Osama Bin
Ladenek emandako elkarrizketa kaleratzen lehenak.
Berau dugu Afganistanetik informazioa eman dezakeen kate
bakarra, taliban erregimenak baimentzen duelako. Al Jazeerak helarazitako
berriak zein iritziak ezinbestekoak bihurtu dira mundu zabaleko hedabide
guztientzako.
Kate hau izan da EEBBek eta bere aliatuek ezarritako
blokeo informatibo hori hausteko gai izan den bakarra; dagoeneko bertsio
bakarreko globalizazioaren aurkako albiste eta iritzi iturri garrantzitsuena
delarik.
Al Jazeera komunikabide arabiarren artean dagoen
salbuespen bakarra dugu, hau ez baitago besteak ez bezala arabiar botere
politiko eta erlijiosoen menpean. Arabiar munduarentzat kate hau ezusteko
galanta izan da, bere askatasun eta albiste zerbitzuen kalitatearengatik.
Bere ikuslegoa 35 milioikoa den arren, hainbat arabiar gobernu berau ixteko
ahaleginetan dabil. Herri askotan bere egoitzak itxiak izan dira, Kuwait eta
Jordania kasu. Beste batzuek, bitartean, salatu eta presionatu egiten dute
telebista kate honen kalterako. Horrez gain, EEBBetako estatu idazkariak,
Colin Powellek alegia, Qatarreko emirraren bitartez, exijitu egin du Osama
Bin Ladeni buruzko albisterik ez eskaintzea eta aliatuen bertsioa soilik
aintzat har dadila.
Kate honek arabiar munduarentzat tabuak izan diren gaiak
jorratzen ditu, hala nola, emakumezkoen papera gizartean, ustelkeria
politikoa, poligamia, edota demokrazia kontzeptuak. Are gehiago, inolako
alderdikeriarik gabe elkarrizketatzen dute israeldar Simon Peres, Tony Blair,
baita talibanen burua ere, edota Colin Powell.
Al Jazeerako kazetari gehienak BBCren arabiar albiste
zerbitzuetan aritu dira. Bere informazio kalitatea ez da zalantzan jartzen
eta bere korrespontsalek mundu osoko gertakizunei buruz berri ematen dute.
Kate hau Ipar Amerikan, Europan, Afrikako iparraldean eta
Ekialde Hurbilean ikus daiteke. Gaur egun, telebista komertziala da,
independentea, nahiz eta Qatarreko emirrak fundatu eta finantzatu hasiera
batean.
Azkenik, aipatzekoa da telebista kate honek etekin
izugarria ateratzen ari dela Bin Ladenekin, honen minutu bakoitzeko 3’6
milioi pezeta, hain zuzen. Are gehiago, hari buruz hitz egiterakoan ez dute
terrorista bezala aurkezten, baizik eta “Al Qaeda” taldearen buru bezala.
Al
Jazeera telebista:
http://www.aljazeera.net
Arabiera-ingelesa
on-line itzultzailea
http://tarjim.ajeeb.com/ajeeb/
Al
Jazeera telebistaren ingelesezko edizio ez ofiziala
http://www.wbur.org/special/specialcoverage/feature_aljaz.asp