Euskarazko Kazetaritzak azken hogeita hamar urteetan izandako hazkundeak errealitate berri bat sortu du gure herrian. Baditugu egunkari, irrati eta telebista nazional bana, zabalpen eremu ezberdineko astekariak ere. Horretaz gain, badugu, herriz herri, eta sektorez sektore, osatzen joan den hedabide txiki eta ertainen sare zabala ere. Euskarazko Kazetaritza Euskal Herri osoan presentzia duen errealitatea da: 500 profesional inguru eta 250etik gora hedabide horren lekuko dira. Hori guztia 779.788 euskaldun dituen herri batean.

Errealitate hori makina bat pertsona, elkarte, gizarte-mugimendu eta erakunderen ahalegin eta elkarlanaren ondorioa izan da. Orain arte egindakoaz jabetu eta hemendik aurrera izango ditugun erronkei erantzun egokia emateko asmoz antolatu dugu Euskarazko Kazetaritzaren I. Kongresua. Profesionalak, Administrazioa, irakasle eta ikasleak bilduko dituen foroa sortu nahi dugu.