konputagailuen egitura

Bukaera eta aurkezpena

EDURNE LARRAZA MENDILUZE — Mon, 30 May 2011 10:56:14 +0000

Aspaldiko!!

Ikasturte bukaera nahiko gogorra izan da eta oso lanpetua egon naizenez, ezer ez dut idatzi blogean.

Tira, dena oso ondo joan da. Erdibidean gelditu zen talde batek ezik beste guztiek bukatu egin dute proiektua eta oso ondo joan zaiela esango nuke. Maiatzaren 19an aurkezpena egin zuten. Talde bakoitzak 2-3 minutu zituen aurkezpena egiteko, euskarri gisa poster bat zutelarik. Fakultateko hallean egin zuten irakasgaitik kanpoko beste irakasle eta ikasleak bertan zeudelarik. Aurkezpenekin oso ondo moldatu ziren eta egindako proiektuetaz arro zeudela ikus zitekeen. Argazki eta bideoak atera nituen, baina bideoak prozesatzeko aukerarik oraindik ez dut izan. Argazkiak hementxe dituzue:

Aurkezpenak

Proiektua bukatu duten 29 pertsonetatik (55 matrikulatu – 7 hasieratik ez direnak etorri=48 – 4 pare batean bakarrik etorritakoak=44 – 7 ezegonkorrak = 37 -2 bat-batean desagertutakoak = 35 – 6 proiektuarekin hasi baina erdian utzi zutenak =29), irakasgaia 22k gainditu dute. Suspenditu dutenen artean, 4k ez dute gainditu azterketan ez 1. zatia ezta proiektuari zegokiona ere. 2k ez dute gainditu 1. zatia baina bai proiektuari zegokiona eta azken bat apunteak ateratzen eta txuletarekin harrapatu nuen. Beste modu batera esanda, proiektua egin duten 29 ikasleetatik 24 materia hori gainditu egin dute. ia % 83a.

Analisi sakonagoetan oraindik ez naiz sartu, baina egiten dudanean jakinaraziko ditut.

Hurrena arte,

Edurne.

11. astearen bukaera

EDURNE LARRAZA MENDILUZE — Tue, 12 Apr 2011 09:03:47 +0000

Oraingoan astea, asko gustatu zaidan esperientzia batekin amaitu da. Irakasgai honetan lantzen ditugun problemak nahiko luzeak dira, enuntziatuak behintzat bai. Sistema automatiko baten funtzionamendua adierazi ohi dute enuntziatu horiek. Adibide gisa, pasabide estu batean autoak pasatzeko sistemaren kudeaketa. Sistema horrek sentsoreak ditu autoak iristen direla detektatzeko eta semaforoen kontrola egin behar da. Emaitza gisa kontrol hori egingo duen sasi-kodea eskatzen dugu. Sasi-kode hori zatitxo askotan banatzen denez, pentsatu nuen egokia izango zela talde bakoitzean ebazpenaren zati bat egitea. Ondo atera zen eta kasu batzuetan talde batzuk beste talde batzuen informazioa behar zutenez, galdetzera joan ziren. Emaitza osoa arbelean idatzi zuten talde desberdinek.

BAINA:

Noski baina bat egon behar zuen, baina horrela ikasten da, ezta? Nire aldetik, denboraren kontrolak egin zuen huts. Hori dela eta ebazpena ondo ote zegoen aztertzeko denborarik ez genuen izan. Arbelean idatzita zegoen emaitzaren argazkiak egin nituen eta dokumentu batean helaraziko dizkiet ikasleei ebazpenaren inguruko oharrak.

Hurrengoan hobeto kontrolatuko dut.

10 eta 11. asteak

EDURNE LARRAZA MENDILUZE — Wed, 06 Apr 2011 15:33:12 +0000

Bi aste hauetan proiektuan sartuta gaude buru-belarri. 10. astean proiektuaren zehaztapena egiten bukatu dute talde gehienek eta behin argi daukatela zer den egin nahi dutena eta gainera egin nahi duten hori onargarria dela, programaren zirriborroa egiten hasi dira.

Puntu horretan gauza asko gertatu dira. Denbora tarte luze batean ikasleak erabat galduta zeuden. Ez zekiten zer egin behar zuten. Hori ondo ikusten zen egiten zituzten galderetan. Ahal nuen moduan erantzuten nien galdera horiei, batzuetan pista gehiago eta beste batzuetan gutxiago emateko aukera ematen zutelarik. Gehienak hasi ziren zerbait idazten eta idatzitakoaren gaineko oharrak edo iradokizunak ematen nizkien. Talde gehienetan halako batean entzuten zen: Aaahhh Orain ulertzen dut!! Edo beste modu batera esanda EUREKA!!! Eta horrela talde gehienak iritsi dira programatzen hasteko aurreikusita geneukan egunera, dagoeneko programatzen hasteko zerbaitekin.

Zazpi taldeetatik bik ordea badaukate zer esan gehiago. Talde batean kasketa harrapatu eta blokeatu egin dira. Ez dakigu zer egin behar den eta ez duzunez azalpenik ematen hemen gaude ezer egin ezinean! Gaur, haiekin jarri naiz, hitz batzuk elkar trukatu ditugu eta haserrea alde batera uztea lortu dugula uste dut. Izan ere, plan berriaren ezarpena dela eta, talde horretako kide guztiek lehenengo lauhilekoan gai honetan lantzen duguna beste irakasgai batean landu dutela, beraz, besteek baino arazo gutxiago izan beharko lukete. Baina kasketa horrekin blokeatuta geratu dira. Azkenean aitortu dute konponbidea nirekin lehenago hitz egitea zela, eta orain pilak jarri eta aurrera egingo dutela.

Beste taldeak gehiago kezkatzen nau. Izan ere, ez diet ikusten lan egiteko gogorik, nik ibili behar dut esan eta esan hau eta bestea falta zaizue eta hau horrela egin behar duzue eta… Zalantza handiak dauzkat proiektua aurrera ateratzeko kapaz izango direnik, gehien bat ez dutelako asmo handirik jartzen. Gutxitan dago klasean talde osoa… eta horrelako asko jar nitzakeen. Ikusiko dugu zer gertatzen den.

9. astea

EDURNE LARRAZA MENDILUZE — Thu, 24 Mar 2011 13:53:30 +0000

Tira, 3 aste daramazkit bizi seinalerik eman gabe eta orain gauza mordoa daukat esateko. Ainhoak esan zuen bezala, emaitza kaskarreko esperimentuaren ondoren, gaiaren nondik norakoak azaldu nizkien gainetik ikasleei eta ondoren haiei sortzen zitzaizkien galderak planteatzeko eskatu nien. Horren emaitza dezente hobea izan zen, dinamikoagoa behintzat bai eta kasu askotan denon artean eman genien erantzuna planteatutako galderei.

Hurrengo astean (7. astea), teoria gutxi gora behera landuta zegoenean, ariketak ebazten pasa genuen. Ariketa bat arbelean ebatzi ondoren, ikasleei eskatu nien haiek adieraztea non eta zergatik egin zituzten egindako akatsak. Bertatik, informazio oso interesgarria lortu nuen, zeintzuk ziren zalantza gehien sortzen zituzten kontzeptuak adibidez. Emaitza horiek hartuta, klase oso bat dedikatu genion zalantzak argitzera.

8. astearen bukaeran, ostegunean, lehenengo 2 gaiei buruzko azterketa egin behar genuenez, asteko beste bi saioak, gainbegiratzera eta zalantzak argitzera dedikatu genizkion. Eskolara, 35 eta 45 ikasle artean etorri izan dira beti, azken aldian nahiko egonkortu zen kontua eta 40 inguru etortzen ziren, horietako 4 oso egonkorrak ez direlarik. Azterketara 37 ikasle aurkeztu ziren. Horietatik 17k gainditu dute (%46), 6 daude 4 eta 5 artean (%16) eta 14 4tik behera (%38). Printzipioz, programan adierazita bezala, azterketa hau suspenditzen dutenek, derrigor bukaerako ebaluazio osoa egin behar dute.

Gaur 9. astea amaitu dugu. Aste honetan proiektuari sarrera eman diogu. Asteartean, azterketaren emaitzak ikusi ondoren, ikasleei aurrera egiteko baldintzak negoziatzeko aukera eman nien. Haiek bi proposamen aurkeztu dizkidate. 1.an, nota igotzeko lan bat egiteko aukera eskatzen zuten. Horrela denek nota igota, 5etik gertu zeudenak 5eko lortu ahal izango zuten ebaluazio jarraituan segitzeko. 2.ean, ebaluazio jarraituan ez dauden ikasleak, baina proiektua egingo dutenak, proiektuaren nota azken notaren %20a izatea eskatzen zuten. Eskaera horiek oinarri hartuta, nik beste bi proposamen egin dizkiet. 1.a, 4 eta 5 artean daudenak (horregatik notak aurkezterakoan horiek aparte jarri ditut), azterketa ondo ebatzita entregatuz gero, ebaluazio jarraituan segitzeko aukera izango dute. 2.a, proiektua egiten duen orori, proiektuaren emaitza azken notaren %35a emango dio. Hori bai, azterketan proiektuaren bidez landuko den gaiaren zatia egin beharko dute denek eta gutxienez 4/10 atera gainditzeko. Beste goxokitxo bat ere aurkeztu diet; taldekide guztiek azterketa horretan 7/10 ateraz gero, azken nota 0,5 puntu igoko diet taldekide guztiei.

Une honetan negoziazioa hor dago. Hurrengo astean erabaki beharko dute proposamena onartzen duten edo ez.

Horrez gain, lehen esan bezala, proiektuarekin hasi gara dagoeneko. Astelehenean, taldeak eratzeko arauak aurkeztu genituen. Orain arte taldeka lanean aritu dira, baina oso serio hartu gabe. Orain proiektua lan mardula dela eta talde-lanarena serioago hartu behar dutela adierazi nien. Batzuk erabaki dutenez proiektua ez egitea, talde batzuk berregituratu behar dira.

Horrez gain, egoera-makinen funtzionamendua azaldu nien eta esan nien pentsatzeko makina-saltzaile baten (desberdinak talde bakoitzeko) egoera-makina nolakoa izango den.

Asteazkenean, proiektuaren zehaztapena banatu zitzaien ikasleei. Horrekin, talde bakoitzak bere makina-saltzailea zein izango den erabaki zuelarik. Jarraitu zuten egoera-makina diseinatzen eta hurrengo egunerako teoria zati bat irakurtzeko eskatu nien.

Ostegunean, suposatzen da teoria irakurrita zeukatela. Taldean poster bat egin dute non adierazi behar zuten, teoria eta proiektuaren arteko loturari buruz eztabaidatutakoa eta, proiektua garatzeko behar diren ezagutzen artetik, zeintzuk badakizkiten eta zeintzuk ez. Kosta zaie, baina posterrak nahiko adierazgarriak dira, ondorengo argazkietan ikus dezakezuen bezala:

proiektuaren 1. posterra

Eskolan azalpen batzuk eman ditugu posterren inguruan, gainera moodleeko egunerokoan ere komentario batzuk egin ditut eta hurrengo egunetan, material gehiago jaso ondoren, horren gainean jarraituko dugu lanean.

Hau guztiaz gain, gauza kurioso bat gertatu da. 5 ikaslek esan dute nahiago dutela proiektuaren presiorik gabe ikasten joatea eta bukaerako azterketa egitea. Haiekin hitz egin dut eta garbi daukate ez dela egongo klase arruntik, bere azalpenekin eta ariketa klaseekin eta abar. Horren ordez, eskolak proiektuan oinarriturik egongo dira. Hori onartu dute, baina jarraitzen dute eskolara etortzen. Momentuz, aste honetan aurreko gaiak lantzen ari dira, bostak taldean jartzen dira eta ariketak lantzen ari dira. Zalantzak dituztenean deitzen naute eta bestela haien erritmora jarraitzen dute. Bitxia iruditzen zait, eta jarraitzen dut pentsatzen azterketa gainditzea gehiago kostatuko zaiela, baina gutxienez ez dira erabat galdutako ikasleak.

Beno, ea hemendik aurrera idazteko maiztasuna mantentzen dudan.

Aio.

6. astearen hasiera

EDURNE LARRAZA MENDILUZE — Tue, 01 Mar 2011 17:27:39 +0000

Aste hau ez da oso ondo hasi. Esperimentu txiki bat egin dut eta nik esango nuke ez zaidala oso ondo atera. Nire asmoa zen teoria lantzea galderak eginez. Nik galdera bat planteatu, ikasleek galdera eztabaidatu taldean, ondoren talde bakoitzak bere erantzuna idatzi (konputagailu batean egin dugu eta proiektatuz) eta azkenik, denok eztabaidatu. Ondorioa izan da tarte hil asko geratzen direla eta ikasleak aztoratu egiten direla. Gainera gauza gutxi lantzeko denbora luzea behar da.

Inor saiatu al da horrelakorik egiten? Hala bada, eskertuko nioke esatea nola egin duen.

5. astea

EDURNE LARRAZA MENDILUZE — Thu, 24 Feb 2011 20:44:51 +0000

Aste hau berezia izan da. Gure fakultatean lauhileko bakoitzean bi aste trinko ezarri dira. Aste horietan irakasgai bakoitzak goiz oso bat du erabilgarri, azterketa partziala, laborategia, tutoretzak edo bestelako gauzak egiteko. Gure kasuan bi azpitaldetan banatu dugu talde osoa eta laborategi bat egin dugu.

Joan den astean laborategian simuladore batekin jolasean aritu baginen, aste honetan benetako makina batekin aritu gara, PCarekin. C-z idatzitako programak konpilatu eta exekutatu ditugu, x86 mihiztadura-lengoaian idatzitako programak mihiztatu eta exekutatu ditugu eta azkenik, C-z idatzitako programak konpilatzerakoan, konpiladoreak zer nolako mihiztadura-lengoaia sortzen duen ikusi dugu.

Dirudienez, ikasle guztiek lortu dute laborategiko atal guztiak amaitzea. Laborategi hauek ez dira beharrezkoak irakasgaia gainditzeko, baian bai dira lagungarriak teoria eta praktikaren arteko zubi gisa.

Hurrengo astean, asteartean, komentario batzuk egingo ditut eskolan, haiek garbi izan dezaten zer den orain arte egindakotik jakin, jakin behar dutena eta zer den laguntza gisa sartu duguna. Ondoren, hasiko gara azpirrutinekin, hau da, nola kudeatzen dira azpiprogramak mihiztadura-lengoaiako mailan.

4. astearen bukaera

EDURNE LARRAZA MENDILUZE — Thu, 17 Feb 2011 13:19:12 +0000

Atzo laborategia izan genuen. Askotan esan behar izan nuen bezala, helburua ez zen TXORI mihiztadura-lengoaiaz programatzea baizik eta BIRD makinaren simuladorea probatzea. Hartara, nire asmoa zen haiek simuladorearekin saltseatzea eta zeuden aukera guztiak probatzea. Pentsatzen nuen hori berez aterako zitzaiela, botoi guztiak sakatzea eta ikustea zer gertatu ote zen, bada ez, pixkanaka pixkanaka gauza desberdinak probatzeko eskatuz joan behar izan nuen.

Hala ere, uste dut helburua lortu genuela eta hemendik aurrera ikasleak gai izango direla egiten dituzten programatxoak bertan simulatzen eta emaitza desberdinak aztertzen.

EGITEKO: komenigarria litzake, inkestaren batean simuladorearen erabilgarritasunari buruz galdetzea

3. astearen bukaera eta 4.aren hasiera

EDURNE LARRAZA MENDILUZE — Wed, 16 Feb 2011 11:05:59 +0000

Asteazkenerako, helbideratze modu desberdinak irakurrita ekarri behar zituzten eskolara. Horrela, esperto taldeetan zalantzak argitu ondoren, ariketa bat ebazten hasi dira. Nahiko ondo joan da.

Ostegunerako ordea tranpatxo bat prestatu diet, azterketa sorpresa bat. Agindu diet ez dudala erabiliko notaren %rik lortzeko. Nire ustez, horrek ikasle onen notak izan beharko luketena bezain onak ez izatea eragin baitezake. Hola ba, azterketa egin dute eta ondoren errubrika bat eta emaitza posible bat erabilita, beste ikaskide baten azterketa zuzendu dute. Horrek lagundu dit nolabait niri zuzenketa prozesuan, baina ikusi egin dut errubrika ez zegoela ondo pentsatuta eta gainera horrelako lan batek denbora asko eramaten duela, 6 ordu inguru pasa ditut zuzenketa egiten. Honen inguruan gehiago pentsatu beharko da.

Emaitzei buruz, 41k egin zuten azterketa eta gaizki, nahiko eta ondo balorazioak emanda, honela geratu zen kontua, 17k gaizki, 14k nahiko eta 10ek ondo. Astelehenean haiekin komentatu ditugu emaitzak eta zalantza batzuk argitu ditugu. Askok esaten dute azterketa hobe egin zezaketela jakinda azterketa egongo zela. Hala ere batzuk bai esan dutela pentsatzen zutena baino gutxiago dakitela, eta nire ustez, irakasgaiaren une honetan horretaz ohartzea oso ona da.

Bestalde, hausnarketa egiteko garaia iritsi zela pentsatuz, taldeko hausnarketa, hausnarketa pertsonala eta ikas-metodologiari buruzko hiru gauza ona eta hiru txar aipatzeko eskatu nien.

Taldeei buruz, ikusten da egonkor dauden taldeetan pozik daudela, baina badaude talde pare bat edo hiru pixka bat dantzan dabiltzanak, jendea ez dalako beti etortzen eta horregatik aldaketa dezente egin behar izan ditugulako. Horiek ez daude horren pozik eta haien notetan ere nabaritu da. Batzuekin, ostegunean hitz egin nuen. 5eko taldetik 2 baino ez ziren agertu. Bi horiek beste talde batzuetan sartzea erabaki genuen eta batek behintzat adierazi du orain hobe dagoela. Beste bi astelehenean agertu dira (gutxienez astebete etorri gabe egon eta gero) esanez hasieratik galdu zirela eta erdi ondo zegoen taldekide bakarri kalte baino ez ziotela egiten. Nire proposamena izan da gaian egokitzen saia daitezela, lana eginez eta tutoretzatan zalantzak argituz eta ondoren beste talderen batean egokituko ditudala. Esan didate horrela ez dutela inoiz lortuko besteen mailan jartzea, beraz erabakia izan da edozer gauza berri landu behar dugula taldean sartuko ditudala, baina orain, mihiztadura lengoaia eta C behintzat haien kabuz landu behar dutela, bestela edozein taldetan oztopoa baino ez liratekeela izango. Printzipioz onartu dutela dirudi, ikusiko dugu zer egiten duten.

Azkenik, ikas-metodologiaren inguruan esandakoari buruz, laburpentxo bat egin dut eta jarraian erakusten dizuet:

Talde-lana, oro har, ondo baloratzen da:

Klaseak interesgarriagoak dira
Galdetzeko konfiantza dago
Giro ona sortzen da
Koordinazioa lantzen da
Harremanak sortzen dira

Batzuek ez dute atsegin, baina ikasi behar den gauza da, talde-lana bizitzako alor guztietan suertatzen baita.

Hala ere badaude baina batzuk:

Emaitza hobeak lortzen dira, baina notak besteen menpe egotea ez da atsegina eta egon daiteke zein, lanik egin gabe onurak aterako dizkion talde-lanari. Batzuk paso egiten dute. Zerbait gaizki eginez gero, taldekideengan eragina dauka
- Neurri txiki batean bakarrik daude notak besteen menpe, azterketak banakakoak direlako. Dena den hori ere ikasi beharreko gauza bat da eta taldean norbaitek gure notan eragin txara izan dezakeela uste badugu, norberaren eskuan dagoena egin beharko dugu hori gerta ez dadin.
- Como enfrentarse a los jetas y caraduras
Despistatzea erraza da, batzuetan ez oso serio
- Gogoratu lanean ari zaretela eta saiatu zentratzen. Ikasi behar duzuen beste gauzetako bat da.
Noizbait galduz gero, taldekideek aurrera egin eta norbera gai horretan galduta gera daiteke
- Taldea trinkoa bada ez du horrelakorik gertatu beharko. Galdu den horrek konfiantza izan behar du laguntza eskatzeko. Horrez gain, taldekideek laguntza eskatu gabe ere, jakin beharko lukete arazoaz ohartzen eta laguntza eskatu gabe ere galdu den pertsona horri heltzen.

Landutakoa ez da zailegia diote batzuk, beste batzuk ordea zailtasuna aipatzen dute gauza txarren artean. Hau erlazionatuta egon daiteke taldeak deskonpentsatuak egotearekin, bai barrura, bai kanpora begira ere. Barrura begira, taldekideen erritmoa desberdina da. Kanpora begira, batzuetan beste taldeei itxoin behar zaie.

- Barruan, azkarrago dabilenak besteei lagunduta ez du ikusiko galdutako denbora gisa eta ikasi, asko ikasiko du.
- Kanpoan, bitartean beste zerbait egiten saia zaitezkete. Hurrengo urtera begira kontuan izango dut eta pentsatuko dut ea posible den talde bakoitzak bere erritmoa eramatea.

Eguneroko lana eta materiala pertsonalki aztertu behar izatea ere batzuk gauza on gisa ikusten duzue, beste batzuk txar gisa, esfortzu handiagoa eskatzen duelako, etxean lan egin behar delako.

- Lanik eta esfortzurik gabeko emaitza gutxi izaten da.

Gauzak ez dira asko azaltzen, teoria oinarriak ahulak dira, baliteke batzuetan nork bere kabuz gauzak ulertzeko gai ez izatea, irakaslearekin komunikazio eza.

- Hasieratik esan nizuen ibiltzen ikasten duzuen bitartean saiatuko nintzela erortzen ez uzten edo bestela altxa arazten. Teoria guztia emandako materialean dago. Oraindik ez dizuet eskatu zuen kabuz ezer bilatzeko, hori ere ikasi beharko duzue egiten. Zalantzak argitzeko lehenengo taldea duzue eskura eta taldean ulertzea lortu ez dena galdetu niri inongo arazorik gabe.
- Nirekiko komunikazio eza nabaritzen baduzue mesedez jakinarazi behar nauzuela eta ez naizela aintzakotzat hartzen ari.

Beste batzuentzat ordea ona da txaparik ez egotea.

C ikastea norbaitek ondo baloratu du. Beste batzuk diote ez dakitela C eta suposatzen dela emanda dagoela.

- Ez da suposatzen C badakizuela. Momentuz oso gauza sinpleak programatzen ari gara Cz eta sintaxia baino ez duzue aldatu behar. Ez dago ulertu beharreko gauza beharrik, baina pixka bat landu beharko duzue eta horretarako daukazue materiala eskuragarri.

Gauza solteak:

Onak:

- Proiektuak motibatu egiten du
- Ebaluazio jarraitua
- Talde-lan eta posterrak
- Moodle-eko materiala
Txarrak:
- Ideien talkak. ??
- Talde aldaketak – noizbait egonkortuko dira, baina zuen funtzionamendua da horren arrazoia
- Ariketa ebatzi gutxi – egindako ariketak zuzenketekin eman egin dizkizuet edo moodleen daude eta nik arbelean egingo nituzkeenak baino dezente gehiago dira.
- Talde-lana ez dago organizatua – bai, hala da, baina gauza asko aldatu behar ziren zuen eta nire funtzionamenduan, horregatik antolakuntza hori pixkanaka lortzea espero dut.
- Balorazio globala ??
- Ez dago oinarri finkorik ??
- Papera gastatzea – erosoago iruditzen zitzaidan taldetik mugitu gabe egitea, baina nahiago baduzue zuzenean arbelean idaztea, ez daukat arazorik.
- Desdobleen ordutegiak txarrak dira – bai, niretzako ere, baina ez dago nire esku aldatzea
- Konpetizio modura ikus daiteke ??
- Posterrak
- Argazkiak – sentitzen dut, baina nire lanerako beharrezkoak ditut

Uste dut astebeterako nahikoa hausnarketa izan dugula. Aste honetan laborategi bat daukagu pixka bat jolasteko eta ostegunean saiatuko gara x86 makinen mihiztadura-lengoaian sakontzen.

Aio.

3. asteko lehen saioa

EDURNE LARRAZA MENDILUZE — Tue, 08 Feb 2011 14:52:37 +0000

Gaur Karle egon da eskola nola zihoan ikusten. Denboraz pixka bat larri ibili gara, baina azkenean planifikatutako guztia egin dugu. Karlek argazki batzuk egin ditu, nik ez dut astirik izan.

Etxetik ariketak landuta ekarri dituzte. Eskolan taldean arazoak eta desberdintasunak eztabaidatu ondoren, poster batean idatzi dituzte eta gero zalantza horiek denon artean eztabaidatu ditugu. 3. astea da eta 45 pertsona etorri dira, 55etik. Nire ustez kopuru oso ona da. Gainera badaude beste batzuk, bizpahiru, gaur ez direnak etorri baina etortzen ari direnak. Gainera oro har lanean gustura ikusten ditut ikasleak. Hori bai, badago talde bat oso galduta dagoena. Posible da beste taldeetan denek ez egitea lan berdina, baina gutxi gora behera jarraitzen ari dira. Talde horretan ordea, denak daude galduta, hasieratik ez direlako ari behar bezala. Horregatik, esan diet tutoretzara etortzeko (ostegunean dira etortzekoak). Gauzak garbi jarriko dizkiet eta lanean hasi, beste taldeetan banandu edo ebaluazio jarraitua uzteko aukera emango diet. Ea zer gertatzen den talde horrekin.

Bestela, gaur gertatutakoaren laburpen bat dago jarraian, moodleen egunerokoan jarri dudana da:

Gaurko, ariketa batzuk 2.6 eta 2.8 ekarri dituzue ebatzita. Ariketa horiek eginez izan dituzuen zalantzak partekatu dituzue taldean eta ondoren poster bat egin duzue. Hona posterretan agertu denaren laburpena:

2.6 ariketa modu desberdinetan ebatzi duzue.

Hasteko batzuk while eta beste batzuk for egiturak erabili dituzue. Kasu honetan, printzipioz, behin datua aurkituta ez dago zertan bektore osoa korritu behar, horregatik egokiagoa da while egitura for egitura baino.
Bestalde, batzuk bilatu behar den datua teklatutik sartu duzue. Horrela programa zabalagoa da eta edozein zenbaki bilatzeko aukera ematen du. Cko scanf aginduak ordea zalantza batzuk eragin ditu. Adibidez, nola idatziko litzatekeen, bektore bateko osagaiak jasotzeko. Cko apunteetara jotzen baduzue, 19. orrialdean horretarako adibideak aurkituko dituzue. Berdina egin daiteke amaieran, emaitza pantailaratuz (out agindua erabilita) edo ez pantailaratuz, baina beti komeni da emaitza memorian gordetzea. Bestela ez dira goi-mailako lengoaiaren espezifikazioak betetzen. Datuak teklatutik sartzean ere memorian, dagokien aldagaian gorde beharko lirateke.
Teklatutik datu bat jasotzeko Cz scanf agindua erabiltzen den bezala, Txoriz, in agindua erabiltzen da. Hemen, Txoriren agindu guztien zerrenda daukazue, eta 5. orrialdean sarrera/irteerako aginduak azaltzen dira.
Beste agindu batzuen formatuarekin ere arazoak izan dituzue. Fitxategi berean aurki ditzakezue agindu guztien formatua, adibidez, ld memoriako posizio bateko datua lortzeko, ldx bektore bati erregistro baten bidez indizea adierazteko. mov agindua bakarrik erregistroen artean. Berehalako bat erregistro batean gordetzeko movi agindua erabiltzen da. Eragiketa aritmetikoetan, berehalakoa beti azken parametroa da. Jauzietan, bxx ren ondoren erregistro bat jartzen da eta ondoren etiketa, etikera jauzi egingo da erregistroa 0rekin konparatuta, xx baldintza betetzen bada.
Printzipioz, bektorea 0tik nra korritzea edo ntik 0ra korritzea berdina da. Gogoratu ordea, bektorearen lehen osagaia beti 0.a dela. Gainera, kasu batzuetan, lortzen den kodean eragina badauka. Adibidez, 2.6 ariketan batzuei gertatu zaizue, ntik 0ra korrituz, if bat saihestu duzuela. Dena den, zeuek esan duzuen bezala, soluzio hori ez zen horren intuitiboa.
Atera den beste desberdintasun bat izan da, aldagaiei hasieratik balioa ematea edo programan zehar ematea, hasieran bakarrik lekua gordeta. Honek ere ez dauka eraginik emaitzan, beraz, bi aukerak onartuko ditugu.
Azkenik batzuk aurkeztu duzue bilatzen dugun zenbakia agertzen den posizio guztien balioa itzultzea emaitzan. Hori egiteko ere modu desberdinak daude. Nola egin duzue?

Zerbait ahaztu bazait, mesedez abisatu.

2. astea

EDURNE LARRAZA MENDILUZE — Fri, 04 Feb 2011 13:24:36 +0000

2. asteak ere alde egin digu, eta badirudi nahiko martxa ona hartu dugula. Asteartean 2. gaiari sarrara eman genion. Ikasleek sarrera baten materiala eskuratu zuten taldekide bakoitzak adibide desberdin bat zuelarik. Asteazkenean ariketa bat ekarri zuten landuta. Expertoen taldeak egin zituzten eta landutako ariketen artean bat aukeratu zuten. Ariketa horrekin poster bat egin eta adibide horren berezitasunak azaldu zizkioten klaseari. Hemen, lanean zeudeneko argazki batzuk ikus daitezke. Ostegunean azaltzeko faltatu ziren adibideak azaldu ziren eta jatorrizko taldeetara bueltatu ziren. Bertan, orain denon ezagutzarekin, beste ariketa bat egiteko eskatu zitzaien.

Gai baten inguruko azalpen guztiak eman eta gero, ariketa bat egiteko eskatu ondoren askotan ikusi ditut ikasleak eskuak gurutzatu eta ariketa neuk ebazteko zain. Azalpenak eskatuz gero, nik jaso izan dudan erantzuna izan da adibide bat ikusi gabe ez dakitela nondik abiatu. Egia da, oraingoan adibideak bazeuzkatela, baino inongo azalpenik ez, irakurritakoa ezik eta egin egin dute. Egia da oraindik atal errazenetako batean gaudela, azken batean, beste lengoaia batean, baina programazioko kontzeptuak aplikatu baino ez dute egin behar.

Talde batekin zalantzak dauzkat. Badirudi talde horretan elkartu direla lanerako gogo gutxien daukatenak eta zalantza sortzen zait ea martxan jarraitu eta ikusi taldeak bere kabuz nola eboluzionatzen duen edo taldea partaide bakoitza beste talde batean jarri eta ikusi ea beste taldekideen bultzadak eragiten ote dien. Buruari buelta asko eman dizkiot horrekin eta pentsatzen ari naiz agian haiekin komentatzea ikusten ari naizena eta bi aukerak ematea. Ea talde horretan jarraitu nahi duten edo egokiagoa ikusten ote duten banatzea.

Beno, hurrengo astean gehiago.