2011-05-05 Ezarian. Zientzia, Xabier Martin , Andoain
Giza genoma deskodetu izanak orain arte eman duena eta ekar lezakeena aztertu dute lau adituk BERRIA-n. Hamar urte joan dira ‘Homo sapiensaren gidaliburu’ gisa munduratu zutenetik.
Eider Carton, Asier Fullaondo, Larraitz Egaña eta Itziar Alkorta, Berria egunkariaren egoitzan, moderatzailearen galderei erantzuten. / ANDONI CANELLADA / ARGAZKI PRESS
Bill Clintonek eta Tony Blairrek batera iragarri zuten albistea, 2001eko ekainean: «Giza genoma deskodetzea lortu da». Deskodetzearen lehen zirriborroa zen Nature eta Sciencie aldizkariek batera argitaratua. Bi urte geroago iritsi zen sekuentziazio osoa, 2003an. Hala,Homo sapiensaren gidaliburua eskura zegoen; lorpen horren ondotik izenburu deigarriak iritsi ziren zientzialari baikor eta laborategi interesatuen eskutik. Minbizia, alzheimerra eta beste gaixotasun larri batzuk sendagarri bihurtu ziren luze gabe; gorputzaren ezagutzak ordu arteko muga guztiak hautsita, aurrerakada pentsaezina heldu zen.
