Hitz amaierako-a
-A NOIZ BEREZKO, NOIZ EZ
Euskal hitz batzuk -a letraz bukatzen dira; amaierako -a berea dute: anaia, gauza, kultura, bidaia, maila eta abar.
Gainerako hitzek beste edozein letra daukate amaieran, baina a artikulua ere har dezakete (adib., etxe --> etxea).
-A berezkoa duten hitzak oso-osorik idatzi behar dira: bi anaia, edozein gauza, kultura guztietan eta abar.
Hiztegietan bukaerako a-rekin agertzen dira a berezkoa duten hitzak.
Halaber, deklinatzean gorde egin behar da -a hori, baina bada bukaera aldatzeko lege fonetiko bat:
A+E=E
Alaba + -EN = alabEN
-A BEREZKOA DUTEN HITZAK
1. Banakako hitzak (banan-banan buruz ikasi behar dira edo hiztegira jo behar da informazioaren bila). Zerrenda
2. Zenbait udal-izen: Azpeitia, Barrundia, Ermua... Udalerriak
3. Atzizki edo amaierez osatutakoak. Atzizkiak
4. Jatorrizko erdaran a letraz bukatutako hitz guztiak, adibidez: justizia, ironia, finantza, ekonomia, kultura, literatura, enpresa, teknika, filosofia, garantia, hierarkia,...
BEREZKO -a NOIZ GALTZEN DEN
-A berezkoa duten hitz batzuek, hitz-elkartearen lehen osagaia direnean, "-a" gal dezakete. Ondokoak dira:
- -IA bukaera duten hitzak: biologi azterketa, geologi irakaslea, pedagogi berrikuntza, ortografi arauak, erreferentzi puntua, diplomazi falta, bidai agentzia, Filosofi Fakultatea, Euskal Autonomi Erkidegoa...
- Eliza, burdina, hizkuntza, kultura, natura eta literatura hitzak: eliz agintariak, burdin fabrika, hizkuntz gaitasuna, kultur ekintza, natur zientziak, literatur tradizioa.
Bi multzo horietako hitzak hiru eratan idazteko aukera dago hitz-elkarketan:
a) Berezko -a eta marratxorik gabe (bidai agentzia, kultur ekintza, adibidez).
b) Berezko -a-z eta marratxoz (bidaia-agentzia, kultura-ekintza, adibidez).
c) Berezko -a-z eta marratxorik gabe (bidaia agentzia, kultura ekintza, adibidez).
A berezkoa duten gainerako hitzek ez dute sekula galtzen ( trebakuntza-eskola, adibidez).